وأنا كنت قاعدة في البيت، مش عارفة إيه اللي هيحصل. بعد حوالي ساعة، بابا رجع. أول ما دخل، ماما جريت عليه: ها؟ حصل إيه؟بابا حط مفاتيحه على الترابيزة، وقعد وهو بياخد نفس طويل. بص لي وقال:يا بنتي... هو قال جملة خلتني أعرف إن قرارك إنك ترجعي كان في محله..قال إيه؟بابا بص لي بحزن وقال: قال إنك لو كنتِ بتحبيه بجد، كنتِ رجعتي ورضيتي تعيشي معاه على أي حاجة.
سكت لحظة، وبعدين قال:وأنا سألته: "طب وإنت لو كنت بتحبها بجد، ليه ما كنتش صريح معاها من الأول؟"رفع عينه بصيت لبابا وأنا ساكتة ثواني، كأني كنت بحاول أرتب الكلام اللي جوايا، وبعدها مسحت دموعي وقلت له بهدوء لأول مرة من ساعة ما رجعت: بابا... أنا مبقتش مأمّنة له. ماما بصت لي، وبابا فضل ساكت يسمعني. كملت وأنا بحاول أثبت صوتي: الموضوع مش موضوع بوتجاز ولا تلاجة ولا انتريه قديم.
والله لو كان قالي من الأول إن ظروفه على قدّه، كنت هقبل وأبدأ معاه من الصفر. لكن هو اختار يكدب عليّ وعليك، وقال كلام خلاني أصدق إنه شايل المسؤولية كلها، وبعد ما اتجوزنا وضمن إني بقيت مراته، غيّر كلامه وقال لي نجهز سوا. بابا هز راسه وقال: وأنا فاهم ده يا بنتي.
بصيت له وقلت: أنا لو رجعت له، كل مرة هيقول لي "ما إنتِ وافقتي المرة دي"، وكل ما يحصل بينا خلاف هفضل أسأل نفسي: هو بيقول الحقيقة ولا بيحور عليّ؟ أنا مش عايزة أعيش وأنا شاكّة في كل كلمة بيقولها. ماما قربت مني وقالت: بس يا حبيبتي، الطلاق مش حاجة سهلة. بصيت لها، ودموعي لمعت في عيني: عارفة يا ماما.
.. بس الجواز من غير أمان أصعب. أنا لسه في أول الطريق، ولسه مفيش أولاد، ولسه أقدر أخرج من العلاقة دي وأنا محافظة على نفسي. إنما لو رجعت وأنا مش واثقة فيه، ممكن أفضل كل يوم أقول يمكن يتغير، ويمكن يفهم. .. وبعد سنين ألاقي نفسي خسرت عمري وأنا مستنية حاجة مش موجودة. بابا سألني بهدوء: يعني قرارك نهائي؟بصيت له بثبات وقلت: أيوه يا بابا. أنا عايزة أطلق. ده أنسب حل بالنسبة لي.
سكت بابا شوية، وبعدين قال: طالما ده قرارك بعد ما هديتي وفكرتي، أنا مش هضغط عليكِ. هنمشي في الموضوع بهدوء، ونحفظ حقك من غير مشاكل ولا خناقات. وبالفعل، اتحدد ميعاد وقعدنا معاه ومع أهله. دخل وهو باين عليه إنه كان متوقع إني أرجع، وأول ما شافني قال: يعني إنتِ مصممة على الطلاق؟
Donia Ashraf موثّق ✦ ناشر
كاتب
كاتب إخباري وقاصّ وروائي — أشارككم أهم الأخبار وأمتع القصص والروايات.
أكتب بشغف ما يستحق القراءة — تابعوني ليصلكم كل جديد.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.