جواز بدون قايمه
خطيبي من أول يوم اتكلمنا في الجواز، قال جملة خلت بابا يبص له باستغراب:- أنا مش هكتب قايمة. بابا سكت شوية، وبعدين سأله بهدوء:- يعني إيه مش هتكتب قايمة؟ابتسم وكأنه كان محضر إجابته من قبل ما ييجي:- يعني أنا هجهز بيتي كله على حسابي، من أول الإبرة لحد الأجهزة والأثاث.
بنتك هتيجي بشنطة هدومها، ومش هطلب منها تجيب حاجة. بصيت لبابا وأنا مستنية رده، خصوصًا إن موضوع القايمة كان عامل قلق كبير عنده. لكن خطيبي كمل:- أنا راجل، ومش عايز أبدأ حياتي وأنا باخد من أهلها حاجة. كل اللي هتحتاجه هجيبه بنفسي، وبيتي هيبقى جاهز على الآخر. بابا سأله:- وإنت متأكد إنك هتقدر تجهز كل حاجة؟ضحك وقال بثقة:- متقلقش يا عمي، أنا مش هخلي بنتك تدخل بيت ناقصها حاجة.
الكلام ده طمّن بابا، وأنا وقتها حسيت إني محظوظة بواحد شايل المسؤولية ومش مستني مني ولا من أهلي حاجة. حتى لما ماما قالت لي:- يا بنتي على الأقل جهزي حاجاتك الشخصية كويس، يمكن بيته يكون بسيط. رديت عليها وأنا بضحك:- هو قال بنفسه إنه مجهز كل حاجة، وبعدين أنا مش داخلة على معرض موبيليا، المهم الراجل اللي هعيش معاه.
وفعلًا كتبنا الكتاب. وفي اليوم اللي المفروض يكون أسعد يوم في حياتي، أخدني وطلعنا على شقتنا. طول الطريق وأنا بتخيل شكلها. كنت متخيلة أوضة نوم حلوة، وانتريه جديد، ستاير متعلقة، سجادة تدي للمكان روح، وأجهزة معقولة… مش عشان المنظرة، لكن عشان دي أول بيت ليا، والمفروض أبدأ فيه حياتي من الصفر.
فتح الباب، ودخل قبلي وهو بيبتسم:- اتفضلي يا عروسة، بيتك. دخلت وأنا بضحك، لكن أول ما عيني وقعت على المطبخ… ابتسامتي اختفت. التلاجة كانت صغيرة جدًا، باب واحد، شكلها قديم لدرجة إن لونها نفسه كان باهت. بصيت ناحية البوتجاز. عين واحدة. وقديم ومصدى وقفت مكاني وسألته وأنا مش مستوعبة:- هو… ده البوتجاز؟ضحك وقال:- أيوه، ما هو بيشتغل. بصيت له، وبعدين بصيت للبوتجاز تاني.- بس ده عين واحدة!- وإيه المشكلة؟ هنطبخ على كام عين يعني؟
سكت، ومشيت ناحية أوضة النوم. دخلت، لقيت دولاب قديم، وسر,,ـــــير، ومراية صغيرة معلقة. لفيت وشي له:- فين باقي الأوضة؟قال باستغراب:- باقي إيه؟- التسريحة؟ الكومود؟ أي حاجة؟ضحك:- ما هو عندك دولاب وسر,,ـــــير ومراية، أهو كل اللي محتاجينه. دخلت أوضة تانية وأنا لسه بحاول أقنع نفسي إن أكيد باقي الشقة أحسن. لكن الأوضة كانت فاضية تمامًا. بصيت له:- دي أوضة الأطفال؟- أيوه.- فين السر,,ـــــير؟- لما ربنا يرزقنا بعيال نبقى نجيب.
بصيت حواليا، وأنا مش عارفة أضحك ولا أعيط. رجعت للصالون، وهنا كانت الصدمة الأكبر. الانتريه كان واضح جدًا إنه مستعمل، والكنبة فيها جزء مقطوع من كتر الاستخدام. مفيش ستاير. مفيش سجاجيد. مفيش حتى ترابيزة صغيرة. ناكل عليها وقفت في نص المكان، وبدأت أبص حواليا كأني بدور على حاجة أنا مش شايفاها. هو لاحظ سكوتي وقال:- مالك؟
بصيت له:- إنت قلت لبابا إنك هتجهز البيت كله.- وهو أنا مجهزتوش؟اتلفت حواليا وقلت:- ده بيت عروسة؟ اتغيرت ملامحه، وقال بنبرة بدأت تبقى حادة:- يعني إيه بيت عروسة؟ هو لازم العروسة تدخل تلاقي قصر؟- أنا مقولتش قصر.- أمال؟- قلت بيت طبيعي. بيت أبدأ فيه حياتي. إنت حتى مفيش عندك أوضة أطفال، ولا ستاير، ولا سجادة، والأجهزة كلها قديمة حتى الغساله مافيش غساله ولا مطبخ احط فيه حلل قرب مني وقال:- ما أنا قولتلك مش هجيب حاجة من عند أهلك.
Donia Ashraf موثّق ✦ ناشر
كاتب
كاتب إخباري وقاصّ وروائي — أشارككم أهم الأخبار وأمتع القصص والروايات.
أكتب بشغف ما يستحق القراءة — تابعوني ليصلكم كل جديد.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.