وإيه علاقة ده بالفلوس؟ يعني أخوك غريب؟! أحمد فضل باصصلها. وبعدين قال الفلوس راحت فين؟ نوال سكتت. آخر مرة هسأل… المليون ومتين ألف راحوا فين؟ محمود قال بعصبية دفعت بيهم مقدم شقة. القاعة كلها سكتت. أنا نفسي ما توقعتش الإجابة. أحمد قال شقة؟ محمود هز راسه. أيوه. شقة لمين؟ ليا. أحمد ضحك. بس ضحكته كانت غريبة. إنت خدت فلوس مهري لمراتي ودفعت بيها مقدم شقة ليك؟ محمود قال ماما قالت إن الفلوس هترجع.
أحمد بص لأمه. إمتى؟ نوال قالت لما محمود يبيع العربية. محمود لف ناحيتها بسرعة إيه؟! قالت ما هو لازم نقول الحقيقة! صرخ ما إنتِ اللي قولتيلي إن أحمد مش هيعرف! الصمت اللي نزل على القاعة بعدها كان تقيل. نوال بصتله بصدمة. اسكت! لكن خلاص. الكلمة خرجت. أحمد سأل مش هعرف إيه؟ محمود حاول يتراجع قصدي… مش هعرف إيه يا محمود؟ محمود سكت. وأنا حسيت موبايلي بيهتز في إيدي.
بصيت للشاشة. الرقم الغريب. رسالة جديدة. فتحتها. دلوقتي هيقولوا إنهم اشتروا شقة وإن الفلوس هترجع. قلبي دق. بصيت ناحية نوال ومحمود. وبعدين كملت الرسالة. ما تصدقيش. وصلت واحدة تانية الشقة مش باسم محمود. اتجمدت. كتبت بسرعة أمال باسم مين؟ المرة دي الرد اتأخر. ثواني. وبعدين وصلت صورة. كانت صورة عقد حجز شقة. كبرتها. اسم المشتري… نوال عبد الحميد حسن. بصيت لنوال. يعني حتى محمود نفسه… الشقة مش باسمه. لكن كان فيه حاجة أغرب.
تحت بيانات الوحدة كان فيه اسم شخص تاني باعتباره صاحب الحجز السابق. اسم بنت. دينا عادل منصور. الاسم حسيت إني شوفته قبل كده. فضلت أفكر. وفجأة افتكرت. دينا. خطيبة محمود القديمة. البنت اللي كان خاطبها حوالي سنتين… وفجأة قبل الفرح بشهور قليلة أعلنوا إن الخطوبة اتفسخت. عمري ما عرفت السبب. كل اللي نوال كانت بتقوله عنها بنت ما تستاهلش ابني. بصيت للرسالة. كتبت إنتِ تعرفي دينا؟
ظهرت علامة الكتابة. اختفت. رجعت. وبعدين وصلت أكتر مما تتخيلي. قلبي بدأ يدق أسرع. كتبت إنتِ مين؟ مفيش رد. وإزاي معاكي عقد الشقة؟ مفيش. وإزاي عرفتي موضوع الصندوق والورقة والتحويل؟ فضلت مستنية. وفجأة… رن الموبايل. نفس الرقم الغريب. بصيت للشاشة. وبعدين بصيت للناس حواليّ. خرجت كام خطوة بعيد عن الدوشة ورديت.
ألو؟ في الأول… مفيش صوت. قلت ألو؟ إنتِ مين؟ سمعت نفس بنت بتاخد نفس طويل. وبعدين قالت أخيرًا صدقتيني. قلت بسرعة إنتِ مين؟! قالت مش مهم دلوقتي. لأ، مهم! إنتِ عارفة حاجات عن العيلة دي محدش يعرفها. وعقد الشقة اللي بعتيهولي عليه اسم دينا… إنتِ تعرفيها منين؟ سكتت. وبعدين قالت ملك، لو نوال عرفت إني بكلمك، هتعمل أي حاجة عشان تسكتني. ليه؟ عشان اللي حصل معاكي النهارده… صوتها اتهز.
هي عملته معايا قبلك. اتجمدت. إنتِ مين؟ قبل ما ترد… سمعت صوت نوال ورايا ملك! لفيت. كانت واقفة على بعد خطوات. وشها أبيض. وعينيها مثبتة على الموبايل اللي في إيدي. سألتني بتكلمي مين؟ ما رديتش. لكن البنت اللي على الخط سمعت صوتها. وفجأة قالتلي بسرعة ما تقفليش يا ملك. وبعدين سكتت ثانية. وقالت حطي المكالمة على السبيكر. قلبي دق بعنف. ليه؟ ردت عشان نوال تسمع صوتي. رفعت عيني ناحية حماتي.
Donia Ashraf موثّق ✦ ناشر
كاتب
كاتب إخباري وقاصّ وروائي — أشارككم أهم الأخبار وأمتع القصص والروايات.
أكتب بشغف ما يستحق القراءة — تابعوني ليصلكم كل جديد.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.